Өзендер

Дулат Жексенбаев

Ән туады мұраттан,
Ой туады сұрақтан,
Не бір үлкен өзендер
Басталады бұлақтан.

Бірақ соның барлығы
Жете алмайды теңізге,
Жоғалады ізімен,
Түсіп кетіп көп ізге.

Құтқар анау өзенді,
Құмға сіңіп өлуден.
Құтқар анау аққуды,
Сол өзеннен жеруден.

Ағын судан зерігіп,
Шалшық суға сенуден,
Өзен болу – үлкен сын,
Жолын таппай көнуден!

Өмір кейде тым қатал,
Өмір кейде тұйықтау.
Кей өзеннің жолында
Бөгет болды биік тау.

Не бір асау, асығыс,
Шулы өзендер ақ тарлан,
Ағып-ағып барады,
Құмға сіңіп жоқ болған...

• Facebook
• Twitter
• Vkontakte