Өтер дәурен

Ербол Ақбасов

Таң бозарып атып,
Күн қызарып батып,
Зулап аққан судай
Зымырайды уақыт.

Уақыт деген — жақұт!
Ала алмайсың сатып.
Әрбір сәтің қымбат,
Әрбір сәтің — БАҚЫТ!

Өтер дәурен-дәуір.
Өмір жолы ауыр,
Ту сыртыңнан атпас,
Туған-туыс, бауыр!

Өтер дәуір-дәурен,
Өкінбеші, сәулем!
Жылағанда жанды
Жұбатамын әнмен!..

Кейде жылап, күліп,
Кейде құлап, тұрып,
Өтіп жатыр өмір,
Өмір — сынақ, күдік...

Таппай тұрақтылық,
Кетсең құр аптығып.
Жүрегіңді тыңда,
Тыңда, құлақ түріп!..

• Facebook
• Twitter
• Vkontakte