Анасы жоқ адамдар

Үкітай Ерниязов

Білегін бесік қылған,
Қарызбын ақ шашына,
Жүрегін есік қылған,
Жұмақтың бақшасына.

Тербетті тал бесікте,
Тербеліп қалды фәни
Бөледім жер бесікке,
Анашым әлди-әлди…

Періште қай ғаламда,
Пейішке барасың ба?
Адам көп айналамда,
Анам жоқ арасында.

Өмірде көп амал бар,
Өлімнің жоқ амалы.
Анасы жоқ адамдар,
Құдайдың балалары.

Айналып бақсы күндей
Болады елес пайда
Анамның ақ сүтіндей
Зәмзәм су жоқ ешқайда

Ақ нұрға боянарсың
Жүрегім мәңгі сәби
Жұмақта оянарсың
Анашым әлди-әлди

• Facebook
• Twitter
• Vkontakte