Заманымның қолын бұлғап өтіп бара жатқаны-ай

Саят Медеуов

Айтар болсам балалықтан бір өлең
Алтайымның жондарында түнеген
Ақ иықтай таң алдында сілкініп
Қарлы шыңның қырағындай түнеген

Елегізіп, елегізіп өткен сол бір шақтар-ай,
Елеңдетер заманымның өтіп бара жатқаны-ай

Бес тас аудай ма ауыздығын шайнаған,
Қызды аулыда көкпар тартып ойнаған.
Қарсы алдымда не тұрса да таймаған,
Сексеуілдің шоғындай боп жайнаған .

Ұмытылмас, ұмытылмас қайран есіл шақтар-ай,
Қолын бұлғап , заманымның өтіп бара жатқаны-ай!

Қартайса да жүресінен танбаған
Боз жорғадай жолдан-жолды таңдаған
Қайран жастық дәуренім-ай өлеңмен,
Жырласам да қызығына тоймаған.

Қайран есіл, қайран есіл ұмытылмас шақтар-ай,
Қолын бұлғап , заманымның өтіп бара жатқаны-ай!

• Facebook
• Twitter
• Vkontakte