Ақтауға кел

Нұркеш Жалғасбай

Маңғыстауда Адай деген бір ел бар
Жігіттері кіл марқасқа, кілең нар.
Арулары ерден өткен намысты,
Көрінгенмен біреу шекер, біреу бал!

Маңғыстауда Ақтау деген қала бар,
Барған адам бас бармақпен бағалар.
Жағалауы ғашық еткен Каспиі,
Маңғыстаудың Ақтауында ғана бар.

Нағыз сұлу, нағыз батыр Ақтауда,
Ашылмаған аңыз жатыр Ақтауда.
Даласындай дархан көңіл көргің келсе,
Ақтауға кел, Ақтауға кел, Ақтауға.

Таза тұнық ауа жұтып ақтаңда,
Қазақылық қаймағыңды сақтауға.
Катар, Дубай, Ыстамбұлда ештеңе емес,
Ақтауға кел, Ақтауға кел, Ақтауға.

Бейнеу, Шетпе, Түпқараған, Мұнайлы
Тектіліктің қайнар көзі сыңайлы.
Қызан, Шебір, Қарақия, Жаңаөзен,
Мұның бәрі Маңғыстауды құрайды.

Ауылынан ақ арманмен аттанған
Талай қазақ бақыт тапты Ақтаудан,
Бір келіп көр естігенше мың рет,
Сырты қатты, іші сондай тәтті аудан.

• Facebook
• Twitter
• Vkontakte