Қотыр тай

Қуаныш Мақсұтов

Ақша үшін етке салдық Айғырды,
Ақшасы оның Бізді бес күн бай қылды.
Қотыр Тайлар Ие боп жүр үйірге,
Күннен күнге қалыңдатып қайғымды.

Айғыр кетті құрбаны боп Тиынның,
Көшбасшыны сатқанына күйіндім!
Құлындары Кімге қарап өседі,
Қотыр Тайлар Ие болған үйірдің ?

Сенбейсің бе?
Далаға шық киін де!
Көрген кезде:
Айқайлама!
Күйінбе!
Биелер де иімейді дұрыстап,
Қотыр Тайлар Ие болған үйірде.

Кісімсіген,
Кісінеген,
Шүйілген.
Тістеп,
Теуіп,
Әркімдерге түйілген.
Тұлпар түгіл Дұрыс Айғыр шықпайды,
Қотыр Тайлар Ие болған үйірден !

Қарының тоқ, тыныш жатсың үйіңде...
Ашық айтсам:
Айқайлама!
Күйінбе!
Күнің үшін Сен де жүрген жоқсың ба
Қотыр Тайлар Ие болған үйірде ?!

• Facebook
• Twitter
• Vkontakte