Қыз ғұмыр

Гүлсәнім Жұмағалиева

Қыз дәурен қызыл қызғалдақ,
Құлпырған аз күн көзді алдап.
Қыз жолы қылдан жіңішке,
Қиын-ақ екен қыз болмақ.

Қыз дәурен қызыл бүлдірген,
Өтерін жаздың кім білген.
Ойнақтап жүрген ботаның,
Кетерін ұзап кім білген.

Ақбота көңіл көркі еді,
Арайлы болсын ертеңі.
Өзгеге қию оңай ма,
Өзектен шыққан еркені.

Қыз дәурен қызыл көбелек,
Ұшар да кетер әуелеп.
Қанатын тынбай қақса екен,
Сәулесі күннің себелеп.

Қыз дәурен қызыл қырмызы,
Көз жауын алған нұр жүзі.
Бақ қонып барған жерінде,
Оңынан тусын жұлдызы.

• Facebook
• Twitter
• Vkontakte