Сезім сыры

Гулмира Жақсылық қызы

Жаны нәзік, жанды аңсадым, жаны асыл,
Ақ ниетті, ақ жүректі, жанашыр.
Бәз біреулер тағдырым деп көнеді,
Ал, біреулер білмей жүр ғой, бағасын.

Менің хәлім тап осылай шарасыз,
Жұмақ жыр мен тозақ тірлік арасы.
Жұбата алмай, жылатам деп қорқамын,
Емдеймін деп жүрегімнің жарасын.

Жүректе мұң, көңіл неге алаңды,
Қала түні, неге бүгін қараңғы.
Жалғыздықтан жабықтың ба жарқыным,
Бір өкініш өкіндіріп санаңды.

Ұнаттың ба, сыр сезімнің сыйын ұқ,
Келмеймін ау, жаным саған бұйырып.
Махаббаттың жаназасын оқыды,
Көк аспанда қара бұлттар түйіліп.

Менің хәлім тап осылай шарасыз,
Жұмақ жыр мен тозақ тірлік арасы.
Жұбата алмай, жылатам деп қорқамын,
Емдеймін деп жүрегімнің жарасын.

Сендей жанды жолықтырмай жаны асыл,
Көк пен жердің араладым арасын.
Кездесейік дейсің жаным қиылып,
Менің хәлім кездесуге шарасыз.

• Facebook
• Twitter
• Vkontakte