Ризамын

Эльмира Шонай

Ағайын жұртым қадірлім,
Ықыласыңды сағындым.
Алғысыңменен батаңнан,
Өсерін білдім бағымның.
Әуелі шексіз ризамын!
Мейіріміне Тәңірдің.

Арайлап атқан таңыма,
Аласармастай бағыма,
Ата-анам алтын тағыма,
Ағайын-жұрттың барына,
РИЗАМЫН!
Елітіп салған әніме,
Анамның ақ сүт дәміне,
Өмірдің шексіз мәніне,
Адами заттың бәріне
РИЗАМЫН!
Салтанат құрған сәніңе ризамын.

Тілекшім менен күндесім,
Тіршілігіммен біргесің.
Тағдырдың тарам жолдары,
Дүние кезек күн кешу!
Бәріне бірдей ризамын!
Ғұмыр дарияда жүргесін.

• Facebook
• Twitter
• Vkontakte