Бала жүрегім-ай

Айдын Сәндібай

Жалындайтын, жанданатын,
Таңдарына таңғалатын,
Жалғанына үміт артып,
Арманына алданатын.
Қайран, бала жүрек.

Айна алдында ашылатын,
Армандарын жасыратын.
Еш уайымсыз жүргенімен,
Есеюге асығатын,
Қайран, бала жүрегім

Қызыққа тоймаған, бақытқа бойлаған,
Адалдық, адамдық бейнесін жоймаған,
Мәңгілік бала боп қалам деп ойлаған,
Бала жүрегім-ай.

Доп теуіп алаңда алаңсыз ойнаған,
Жаз болса каналға барам деп қоймаған,
Алғашқы сүйгенін алам деп ойлаған,
Бала жүрегім-ай.

Сынақтарда берілмейтін,
Сұрақтардан шегінбейтін,
Сезіміне ерік беріп,
Ақылынан жеңілмейтін,
Қайран, бала жүрек.

Өмір мейлі көп алдасын,
Естеліктер жоғалмасын,
Қайдан білсін қайталанбас,
Бала күннің оралмасын
Қайран, бала жүрегім

• Facebook
• Twitter
• Vkontakte